Ililliin daraaraan
hinjirre suur-sammuu
sammuu yaad- badaa
qe’ee keetti margaa
bishaan uuma- albuudaa
qe’ee ollaa injirree
albuudi edadaa
finiinnee horri kee
baddaa keetii maddaa
maqaan kee obboroo
Finfinneen birmada
falfala booyyeefii
buuti sab- iddaan
horteen Tufaa Munaa
moggeen ba’uun gadda!
Booyyeen akkas turee…
Achi-siqiin qabuu
buutiin yoom wal- furee??
Onni Caffee tumaa
kan Gullallee Galaan
horri saawwan keenyaa
“filwuhaan” xuriidhaa
xiraa lolaa jalaa
bakka bobbii jabbii
oolmaa keenya turee
dur Hurufni doobbii
“ miniliik hospital ”
horoo keenya jaaree
lammiin nu dhibamnaan
eenyutu nu yaalee?
Hospitaala keetti !
Maalif of moggaasa
booyyeen mooti darree ! ?
Dirree Caffee araaraa
ilmaan teenya turtiin
ammaan tana garuu
foon keenya qircaa’ee
kiilo 4f 6 -‘n
barattoonni keenya
maaliif jaji’amtii??
Bashannanaaf baanaa
dur gara Waddeessaa
amma eenyut sirbee
taphataa “piyaassaa” ?
Waardiyaa nu taanaan
booyeef buutiin baraa
huurrisee shubbisaa!!
Sulula garbiitti
Gashaa gabbaratuu
“Taklahaymaanotii”
shaniif jahaan lolee
miliyoona Kenya
affeele walitii!!!!!!!!!!
Qarsaa laf-magaalaa
tan daldaltuun ooltu
“markaatoon” baranaa
lafa dafqaan bultuun
sagadaa dachaatti
hidhatti guurramtu!!
Iddoon Caffee muudaa
amma ree “lidataa”
manni murtii ol’aanaa
hidhamtoota sabaaf
murtii dabe laataa!
Araarri kan hafeef
dhakaa araaraatu
nujalaa dur cabee
sharaataniif heelton
eenyurra kan yaabee??
“araadaa gi’oorgiis”
aasxaa gabrummaa
irra yaabanii
farduma keenya
maqaa moggaasan
“daanyoofi daanyaa”
nurratti dhaaban
boca hammeenyaa
Odaan Gullallee jigee
gaaddifne mulqamee
fardi faaya keenyaa
qawween lugaamamee
kooraan yaabbatamee
du’aafi jiruttis
ukkaamsamuun kenya
siidaa booyyeef buutiin
kunoo nuuf eeramee!!
Kan jiruun si ‘jjeese
buutin dhakaa majjee
awwaal-diigas saree
abbooma kee haalee
siidaa sirra- jaarraaf
eker-dubbistuudhaan
wal-faana hiriiree…
Albuunni handhuuraa
kan gullallee galaan
alaan bahaa jiraa
aalan dawaa firaa
babbaqaqee jigaa!
Babbaqaqaa hagaa
handhuurri Oromiyaa…F
naannowa handaaraa..
Majiin dhakaan daakkaa
daakuuf totolfamee
daakee midhaan nyaatee
daakee fiixa tumee
qaroon dhiig-haqaa
inni haqisaa dabee
ayyaan- Tufaa Munaa…F
lallabbiin birmannaa
waaqi haq-utubee
qarri sun naqarsee
dhakaa araaraa keessaa
mootiin buutii darbe !..
Qoreen loomii biraa ?
Mi’aansaa shankooraa
qoreen loomii farraa
hadhaan lammii nyaaraa…
Imimmaan hinqooruu
adaamiin agamsaa
agamsi kan darraa…
Re’een jimaa qaamaa
qaamaan rooba riqaa
hoolaan qoolli gogaa
gaggabdoo diddaadhaaf
aduu jalaa maqaa
bishaaniifi zeeytiin
qodaa tokkoo takkaa?
Uumami laf-kanaa
hunduu bakka bakkaa
maaltuu waliin gahe
loomii urgaa laattuuf
lootuu qoree abshookaa!!?
Handhuura hawwinu
karra kamiin seennuu?
Olii gara kaabaan
qirixiin seennumoo
gadii gara lixaan
gafarsaan lixnumoo
karra qoree gorree
Jimmaan haa joorrumoo
karra alloo cirree
Walloon willisnumoo
Bushooftuu irreeffannee
karra qaalluutirraan
qubachiifna qomoo!…….
————————————————
Walaleessan: Eebba Coqorsaa